channellondon

राहुल रेग्मी

निर्वाचन आयोगले १७ र २७ वैशाखमा गरी दुई चरणमा हुने गरी तय भएको प्रतिनिधि सभा निर्वाचनका लागि करिब ८ अर्ब खर्च लाग्ने अनुमान गरेको छ । आयोगले आइतबार अर्थ मन्त्रालयका सचिवसहितसँग निर्वाचन खर्चबारे छलफल गरेकामा करिब ८ अर्ब खर्च लाग्ने प्रारिम्भक निष्कर्ष निकालेको हो ।

आयोगले यसपटक कोभिड–१९ लाई समेत मध्यनजर गरेर निर्वाचन तयारी गर्नुपर्ने भएकाले अघिल्ला निर्वाचनमा भन्दा खर्च केही बढ्ने अनुमान गरेको छ । सो विषयमा प्रारम्भिक खाका बनाउने काम भइरहेको आयोगका प्रवक्ता राजकुमार श्रेष्ठले जानकारी दिए ।

संसद् विघटनको घटनापछि सरकारको सिफारिसमा दुई चरणमा गर्ने गरी तोकिएको निर्वाचनको तयारी गर्न आयोगले निर्वाचन कार्यायोजनासमेत तयार गर्दै गरेको छ । आयोगले कार्ययोजनामा निर्वाचन तालिकादेखि निर्वाचन कार्यक्रम र खर्च तथा व्यवस्थापनका विषयलाई समेट्दै छ ।

यसअघि २०७४ सालमा सम्पन्न प्रतिनिधिसभा र प्रदेशसभा निर्वाचनका लागि ७ अर्ब ७५ करोड ९५ लाख ४१ हजार खर्च लागेको थियो । त्यस बखतको निर्वाचनमा सरकार, सुरक्षा निकाय, पर्यवेक्षकलगायतमा तीनै तहको निर्वाचनमा गरी ३० अर्बभन्दा बढी खर्च भएको थियो ।

तर आइतबारको छलफलमा सहभागी नेकपा प्रचण्ड–नेपाल समूहका नेता राजेन्द्र पाण्डेले संसद बिघटनको बिषय सर्वोच्च अदालतमा विचाराधीन रहेकाले चुनावको नाममा अनावश्यक खर्च नगर्न आयोगलाई सुझाव दिए । नहुने निर्वाचनका नाममा अनावश्यक खर्च गर्न नहुने पाण्डेको तर्क थियो । कांग्रेस नेता आनन्द ढुङ्गानाले भने आयोगले निर्वाचनको तयारीको काम सहज रुपमा गर्न पाउनुपर्ने आफुहरुको धारणा रहेको बताए । नेकपा (ओली समूह)का बाबुराम दाहालले पनि निःसंकोच निर्वाचनको प्रक्रियालाई तिव्रता दिन आयोगलाई आग्रह गरेका थिए । आयोगका प्रवक्ता सहसचिव राजकुमार श्रेष्ठले निर्वाचनको तयारीका बारेमा जानकारी गराई राय सुझाव लिने काम गरेको बताए । आयोगको कार्यक्रममा सहभागी भइदिन आग्रह गर्दै निर्वाचन कार्यक्रमको प्रस्तावित मितिका बारेमा पनि दलहरुलाई जानकारी गराएको आयोगले जनाएको छ ।

यसअघि विभाजित नेकपाका दुबै समूहले छुट्टाछुट्टै आयोगमा पुगेर निर्वाचन सम्बन्धमा आ आफ्ना दृष्टिकोणसहित आयोगलाई दवाबकै शैलीमा सुझाव दिएका थिए । आयोगमा दोस्रोपटक आधिकारीकता दावी गर्न जाने क्रममा प्रचण्ड माधव समूहका नेताहरुले संसद विघटनको मुद्धा सर्वोच्च अदालतमा विचाराधीन रहेको अवस्थामा चुनावी तयारीको कुनै अर्थ नहुने बताएका थिए । उनीहरुले निर्वाचन घोषणाको सरकारी निर्णयविरुद्ध समेत अदालतमा मुद्धा परेकाले तत्कालका लागि निर्वाचनका कुनै पनि कार्यक्रम अघि नबढाउन आयोगलाई भनेको थियो । त्यसलगत्तै नेकपा(ओली समूह)का नेताहरु बहादुर भवन पुगेर सरकारको काम निर्वाचनको मिति तोक्ने र तोकिएको मितिमा निर्वाचन गराउने जिम्मेवारी आयोगको भएको स्मरण गराँउदै विना ढिलाई कार्यक्रम अघि बढाउन आयोगको ध्यानाकर्षण् गराएको थियो । सर्वोच्च अदालतमा मुद्धा परे पनि अदालतले निर्वाचन सम्बन्धमा कुनै अनतरिम आदेश जारी नगरेकाले निर्वाचन कार्यक्रम रोक्न नहुने आयोगको बुझाइ छ ।

(जीएनएन)

संयुक्त राज्य अमेरिकाकी नवनिर्वाचित उपराष्ट्रपति कमला ह्यारिसले बिहीबार बिहान नयाँ राष्ट्रपति निर्वाचन भए पछि आयोजित भर्चुएल प्रार्थना सेवामा चर्चित फेशन डिजाइनर प्रबल गुरुङले बनाएको पोशाक लगाएर भाग लिएकी छन्। गुरुङले आफ्ना श्रीमानसंग प्रार्थना सभामा सहभागी ह्यारिसको तस्वीर सहित एक ट्विट गरेका छन्। “हामीले डिजाइन गरेको पोशाक लगाएर उपराष्ट्रपति प्रार्थना सभामा सहभागी हुनु भयो। कृतज्ञता, हार्दिक कृतज्ञता,” गुरुङले आफ्नो ट्विटमा भनेका छन्।

प्रबल गुरुङ को हुन्?
अमेरिकाको न्यूयोर्कमा बस्दै आएका प्रबल गुरुङ नेपालमा हुर्किएर विश्वमै प्रसिद्धी कमाउने सीमित ‘फेशन डिजाइनर’ मा पर्छन्।

सिंगापुरमा जन्मिएर काठमाडौंमा हुर्केका प्रबल हलिउडदेखि बलिउडसम्मका सेलिब्रेटीले रुचाएका चर्चित डिजाइनर हुन्।
पूर्वअमेरिकी प्रथम महिला मिसेल ओबामादेखि बेलायती राजकुमारी केटसम्मले उनले डिजाइन गरेको लुगा रुचाएका छन्।

बलिवुडका अन्तर्राष्ट्रिय रुपमा चर्चित कैयौँ महिलाहरु सजिएका छन्। सामाजिक सञ्जाल ट्वीटर, इन्स्टाग्राम र फेसबुकमा उनका लाखौँ प्रशसंक छन्। आफ्नै नामको फेशन ब्राण्ड स्थापना गरेका उनका भारतको मुम्बईसहित अमेरिका र युरोपमा १०० वटा फेशन स्टोर छन्।

गुरुङले आफ्नो जीवनीमा आधारित ‘कफी टेबल बुक’ किताब पनि लेखेका छन। प्रबल गुरुङ शीर्षकमा सार्वजनिक हुने उनको किताबमा आप्रवासीको कथा र आफ्नो अमेरिकी सपना पूरा भएको कथा समेटिएको उनले लेखेका छन्।